អ្នកនាំពាក្យ៖ មេធាវីជនបង្កបុកមនុស្ស ៣នាក់ស្លាប់ និងរបួសនៅខណ្ឌដូនពេញប្រគល់រថយន្តមកសមត្ថកិច្ច ខណៈជនបង្កមិនទាន់ចូលខ្លួនសារភាព
ភ្នំពេញ៖ អ្នកនាំពាក្យស្នងការរាជធានីភ្នំពេញ លោក សំ វិច្ឆិកា បានបញ្ជាក់ឱ្យដឹងថា មេធាវីរបស់ជនបង្កបើកបុកស្លាប់ម្តាយ និងកូនតូចអាយុ ២ឆ្នាំ និងឪពុករងរបួសធ្ងន់នៅខណ្ឌដូនពេញ បាននាំរថយន្តមកប្រគល់ជូនសមត្ថកិច្ច ខណៈជនបង្កមិនទាន់ចូលសារភាពកំហុសនៅឡើយទេ។
អ្នកនាំពាក្យស្នងការនគរបាលរាជធានីភ្នំពេញ បញ្ជាក់ថា ឧត្តមសេនីយ៍ឯក ជួន ណារិន្ទ បានចេញបទបញ្ជាឱ្យសមត្ថកិច្ចស្រាវជ្រាវ និងតាមចាប់ខ្លួនជនបង្កដើម្បីយកមកអនុវត្តតាមច្បាប់ ដូចនឹងករណីគ្រោះថ្នាក់ចរាចរណ៍នៅខណ្ឌទួលគោកកាលពីថ្មីៗនេះ។
ជាមួយគ្នានេះលោកឧត្តមសេនីយ៍ឯក ជួន ណារិន្ទ ក៏បានប្រាប់ឱ្យក្រុមគ្រួសារជនបង្កណែនាំជនបង្កឱ្យចូលខ្លួនសារភាពកំហុស ខណៈសមត្ថកិច្ចមិនដកដៃឡើយចំពោះប្រតិបត្តិការស្វែងរកជនបង្ក៕
